Manningarfeløgini bíða enn eftir Gerðarrættinum

Hálvan juni løgdu tey trý manningarfeløgini, Skipara- og navigatørfelagið, Maskinmeistarafelagið og Fiskimannnafelagið, málið um kvotukeyp sum loyvdan felagsfrádrátt av óbýttum í Fasta gerðarrættin.

Og har liggur málið enn. Fasti gerðarrætturin hevur ikki havt úrskurðarfund enn.

Fyrst skulu allir partar hoyrast, og skjøl fáast til vegar.

Fasti gerðarrættur skal gera av, um reiðarar kunnu draga kvotukeyp frá, áðrenn manningin verður avroknað.

Hetta er ikki rætt, siga manningarfeløgini, sum tó ikki kunnu broyta sáttmálarnar við Reiðarafelagið fyrr enn 1. apríl næsta ár. 

Reiðarafelagið vísir á ein gerðarrættarúrskurð frá 2013, har tað verður staðfest, at reiðarar hava rætt til at draga frá útreiðslur frá uppboðssøluni í 2011, áðrenn manningin varð avroknað.

Einki stendur í lógini um sjófeingi um hetta, tí ætlanin hjá Fiskimálaráðnum var ikki, at manningin skal missa, tí reiðarar keypa fiskirættindi. 

Manningarnar hava onga ávirkan á rættindakeypini hjá reiðarunum og skulu tí heldur ikki gjalda fyri tey, sigur samgongan.