Manglandi stýring á kommunala búskapinum

Útreiðsluvøksturin hjá kommunum, sum er vaksin 43 prosent, bendir á vantandi fíggjarpolitiska stýring, sigur Búskaparráðið.

Kommunurnar brúktu eina milliard og 667 milliónir í 2011, sammett við tvær milliardir og 392 milliónir í fjør, og tá er eingin peningur til eldrarøkt íroknaður.

Búskaparráðið hartar eisini landið fyri somu vantandi fíggjarstýring. 

Tí útreiðslurnar hjá landinum eru sama tíðarskeið vaksnar 21 prosent síðani 2011, - og tá er eldrarøktin ikki íroknað.

Búskaparráðið ávarar um, at í longdini fer vaksandi talið av eldri borgarum at hava við sær stóran útreiðsluvøkstur, sum fer at leggja stórt trýst á almennu kassarnar.

- Tí eiga almennu kassarnir við varisligum og avmarkaðum útreiðsluvøkstri nú at leggja avlop til viks til at standa ímóti við, sigur Búskaparráðið í heystfrágreiðing síni.