Spyr løgmann um byrging um Haraldssund

Óluva Klettskarð í Tjóðveldi hevur boðað frá einum skrivligum fyrispurningi til Aksel V. Johannesen, løgmann, um byrgingina um Haraldssund

Hon spyr, hvørjar ætlanir Landsverk hevur um at gera byrgingina um Haraldssund lidna, og um løgmaður heldur, at tað er skilagott at teingja arbeiðið at gera nýggjar tunlar norður Fjall saman við arbeiðnum at gera byrgingina um Haraldssund liðugt.

Aksel V. Johannesen umsitur í løtuni samferðslumál í landsstýrinum. 

Óluva Klettskarð sigur í viðmerkingunum til spurningin, at í 2008 fekk Landsverk eina játtan at gera ætlan um at gera byrgingina lidna.

30 mió. kr.

Einaferð varð arbeiðið mett at kosta 30 milliónir kr.

Í Samferðsluætlanini frá 2012 til 2024 verður mælt til, at farið verður undir verkætlanina beinanvegin.

Óluva Klettskarð sigur, at byrgingin um Haraldssund lýkur ikki dagsins krøv. Í ringum veðri er ofta ikki koyrandi fyri sjóroki. 

Løgtingið fer á fundi týsdagin at taka støðu til, um fyrispurningurin skal svarast.