53 spurningar til Landsverk um Glasir

Mikudagin í síðstu viku, hin 28. november, boðaði Samferðslumálaráðið frá, at landsstýrismaðurin vildi hava alt byggimálið kannað.

Í gjár var Samferðslumálaráðið liðugt at orða spurningarnar, sum ráðið vil hava Landsverk at svara.

Sambært Samferðslumálaráðnum er endamálið við gjøgnumgongdini og svarunum upp á spurningarnar í fyrstu atløgu at fáa eina mynd av leiklutinum hjá Landsverki í samband við verkætlanina Glasir. 

Tá ið frágreiðingin er liðug, fer Samferðslumálaráðið at viðgera hana og at gera niðurstøður um, ella hvussu farast skal víðari við málinum, og møguliga meta nærri um, hvussu almennar byggiverkætlanir frameftir kunnu verða betri skipaðar og stýrdar.

Í innganginum til teir 53 spurningarnar til Landsverk sigur Samferðslumálaráðið, at Mentamálaráðið eigur Glasir. Hóast Samferðslumálaráðið ikki hevur myndugleika at kanna onnur aðalráð, so eru tó nakrir spurningar um viðurskifti í Mentamálaráðnum. 

- Hetta tí, at tað er sera týðandi at fáa rættvísandi mynd av málinum, og at samstarvið, samskiftið og kunningin ímillum Landsverk og Mentamálaráðið verður lýst, skrivar Samferðslurmálaráðið millum annað.

Landsverk skal svara teimum 53 spurningunum í seinasta lagi 12. desember - tað er mikudagin í næstu viku.