Fýra hava lækkað, eingin hevur hækkað prosentið

Miðal kommunuskattaprosentið í føroysku kommununum í 2019 er 20.19 prosent. Tað er ein lítil lækking í mun til  miðal skattaprosentið í fjør, tá tað var 20.24 prosent.

Tað vísir yvirlit, ið TAKS hevur gjørt fyri skattatrýstið í føroysku kommununum.

Kommunurnar við lægsta skattaprosentinum í ár, eru Fugloyar- og Skúvoyar kommunur, við 16 prosentum og Fámjins kommuna við 17 prosentum.

Kommunurnar við hægsta skattaprosentinum í ár eru Runavíkar-, Vága- og Skálavíkar kommunur við 22 prosentum.

Fugloyar kommuna hevur eisini hægsta barnafrádrátt í ár - hann er 10.000 krónur. Vágs kommuna hevur lægsta barnafrádrátt - í Vági er barnafrádrátturin 4500 krónur.

Flestu kommunurnar hava óbroytt skattaprosent í ár. Eingin hevur hækkað skattin, men nakrar hava lækkað hann. 

Skatturin er lækkaður í Skopun, á Tvøroyri, í Hvalba og í Fámjin. Størsta lækkingin var í Fámjin, har skattaprosentið fór úr 19 niður í 17 prosent.

Barnafrádrátturin stendur eisini í stað í flestu støðum. Eingin kommuna hevur lækka barnafrádráttin, men í Húsavík, Runavík og í Skálavík er hann hækkaður í ár í mun til í fjør. Størsta hækkingin var í Runavíkar kommunu, har barnafrádrátturin hækkaði 1500 krónur, úr 6500 krónum upp í 8000 krónur.