Landsstyrið ov stóra ávirkan á Fíggjarnevndina

Arbeiðið í Fíggjarnevndini hevur í longri tíð verið stýrt úr Tinganesi, og støðan í Fíggjarnevndini í løtuni er enn eitt dømi um tað. Tað sigur Jacob Vestergaard, limur í fíggjarnevndini fyri Fólkaflokkin.

Tí vil nýggi meirilutin í nevndini hava formansval, sigur Jacob Vestergaard.

Eingin fundur verður í Fíggjarnevndini so leingi, støðan um formanssessin er so ógreið. Tað sigur forkvinnan í Fíggjarnevndini, Ruth Vang. Og tað er leiðslan í samgonguni, sum skal loysa ógreiðu støðuna, sigur forkvinnan.

Jacob Vestergaard vísur á, at hetta er enn eitt dømi um, at tað er landsstýrið, sum stýrir fíggjarnevndini og ikki løgtingið. Og sambært tingmanninum fyri Fólkaflokkin, er tað ein trupulleiki fyri fólkaræðið, tá útinnandi valdið blandar seg í uppgávurnar hjá lóggevandi valdinum.

Nýggi meirilutin i Fìggjarnevndini hevur heitt á forkvinnuna um at áseta fund í nevndini sum skjótast, har teir millum annað vilja hava formansval á skrá. Tí er forkvinnusessurin hjá Ruth Vang hóttur.

Boðini úr samgonguni eru, at tað ikki kemur uppá tal, at samgongan missur formanssessin.