Eldrasamstarvið bíðar enn eftir landsstýrinum

Bú- og heimatænastan í Suðuroynni bíðar framvegis eftir fundinum við landsstýrið um eldrasamstarvið í oynni.

Tað nýggjasta er, sambært formanninum í Bú- og heimatænastuni, at løgmaður sunnudagin lovaði, at fundurin verður innan fyri tíggju dagar.

Tað skuldi so verið í seinasta lagi 20. mars, sigur Dennis Holm. 

Men enn eru tó eingi fundarboð komin, sigur hann.

26.februar frættist annars úr Løgmansskrivsstovuni, at fundurin bleiv fyri hálvan mars.

Bú- og heimatænastan sigur seg hava ov fáar pengar til eldrasamstarvið og vil fundast við landsstýrið um tað.

Bú- og heimatænastan bað landsstýrið um eina serskipan sum tann, Sandoyggin hevur, men hana fingu tey ikki.

Fundur var í januar, og tá varð avtalað at hava fund aftur fyrst í februar. 

Men tann fundurin hevur ikki verið enn.