- Tíðindi, mentan og ítróttur
Týskt trotabúgv fær tvær mió. kr. aftur úr Føroyum
<div>Trotabúgvið eftir týska íløgufelagið Phoenix fekk í dag góðar tvær milliónir krónur frá partafeløgum og einstaklingum í Føroyum, sum sambært búnum fingu ov nógvar pengar frá Phoenix, áðrenn felagið kollsigldi. </div><div><br></div><div>At siga, at trotabúgvið fekk góðar tvær milliónir í Føroyum, er kanska at gera í so nógv av. Tað veldst nú um tey, sum skulu gjalda pengar aftur, eru før fyri tí, tí talan er ikki um smápengar. </div><div><br></div><div>Føroya rættur viðgjørdi fyrrapartin 12 stevningar frá trotabúnum móti partafeløgum og einstaklingum í Føroyum.</div><div><br></div><div><b>Tey flestu játtaðu</b></div><div><br></div><div>Tey flestu tóku játtandi til orðanna, sum tað eitur á rættarmálinum. Tað merkir, at tey góðtaka kravið frá trotabúnum, tí tey vænta ikki at fáa viðhald, skal mál teirra takast upp til dóms, og so koma tey at skylda sakarkostnað eisini.</div><div><br></div><div>Níggju av teimum 12 tóku játtandi til orðanna, trý mál vóru ikki klár at avgreiða í dag. </div><div><br></div><div>Størsta kravið er góðar 630.000 kr., tað fekk eitt smápartafelag. Minsta kravið er 42.400 kr. Størsta kravið, sum ein einstaklingur skal gjalda, er 578.000 kr.</div><div><br></div><div><b>Halda seg hava góða sak</b></div><div><br></div><div>Trotabúgvið heldur seg hava eina góða sak í Føroyum, eftir at Eystari landsrættur hevur felt dómar í málum móti donskum íleggjarum í Phoenix. </div><div><br></div><div>Og tað var enntá fimta deild, hon sum plagar at vera í Føroyum, sum segði hesar dómar. Fimta deild hjá Eystara landsrætti fer tí neyvan at døma øðrvísi í føroyskum málum.</div><div><br></div><div>Trotabúgvið stevndi eftir pengum, sum tey stevndu, sambært stevningini, av órøttum fingu frá týska íløgufelagnum, tí talan var um fiktivar pengar, pengar, sum í veruleikanum ikki vóru til. Tað eru pengar, sum fólk og feløg fingu umframt tað, sum tey settu í Phoenix. Trotabúgvið stevnir fyri at fáa pengar til øll hini, sum einki tóku av sínum kontum í Phoenix og tí mistu tað, tey settu í íløgufelagið.</div><div><br></div><div>Fremsta málið hjá einum trotabúgvi er at fáa sum flestar pengar at býta millum kreditorarnar hjá tí, sum fór á heysin. </div><div><br></div><div><b>Avdúkað í 2005</b></div><div><br></div><div>Virksemið hjá Phoenix Kapitaldienst varð avdúkað í 2005, eftir at stovnarin árið fyri doyði í einari flogvanlukku. Phoenix fekk millum annað nógvar føroyingar at seta pengar í felagið við tí endamáli, at pengarnar fóru til íløgur, sum so skuldu geva teimum, sum settu í, avkast. </div><div><br></div><div>Og fólk og feløg fingu eisini pengar aftur frá Phoenix. Men tað vóru pengar hjá nýggjum íleggjarum, sum gomlu íleggjarnir fingu. </div><div><br></div><div>Málini verða avgreidd eftir týskum rætti. Sambært týskum rætti ber til at fara fýra ár aftureftir frá húsaganginum, so stevningarnar umfata árini 2001 til 2005.</div><div><br></div><div> </div><div><br></div>
