Fiskivinnuráðið er ímóti hægri tilfeingisgjaldi

Ráðið eftirlýsir einum langtíðar fiskivinnupolitikki í staðin fyri lógarbroytingar, ið skulu hækka inntøkurnar hjá landskassanum

Fiskivinnuráðið óttast fyri, at samsvarandi gjøld eisini verða løgd á onnur fiskasløg, um makrelkvotan minkar munandi.

Høgni Djurhuus

Johnsigurd Johannesen

12.12.2012 - 09:27

<div>Endamálið við lógarbroytingini tykist fyrst og fremst vera at tryggja landskassanum inntøkur, heldur enn at vera grundað á langtíðar fiskivinnupolitisk atlit, millum annað um grundarlag er fyri at leggja gjøld á vinnuna, sigur Fiskivinnuráðið, sum fekk lógaruppskotið til hoyringar. </div><div><br></div><div>Fiskivinnuráðið óttast fyri, at samsvarandi gjøld eisini verða løgd á onnur fiskasløg, um makrelkvotan minkar munandi. </div><div><br></div><div>Slíkur búskaparpolitikkur er ikki í samsvari við tann fiskivinnupolitikk, sum kom til sjóndar í umrøðuni á Fiskivinnutinginum herfyri um at leggja avgjøld á óvanliga stóran vinning.  </div><div><br></div><div>Fiskivinnuráðið vísir á, at fortreytin fyri yvirhøvur at tosa um tilfeingisskatt ella tilfeingisgjøld er, at ein tilfeingisrenta er, at fiskiskapurin kastar nakað av sær.   </div><div><br></div><div><b>107 mió. kr.</b></div><div><br></div><div>Sambært uppskotinum hjá landsstýrinum skal makrelurin geva 107 milliónir krónur í tilfeingisgjaldi næsta ár.Tey, sum fiska makrel, skulu lata landskassanum 75 oyru í veiðigjaldi av hvørjum kilo.     </div><div><br></div><div>Skip, sum lata makrelin til útlendsk móttøkuskip ella selja hann uttanlands, skulu, eins og í ár, eisini rinda tvær krónur í avreiðingargjaldi næsta ár.</div><div><br></div><div>Fiskivinnuráðið sigur, at tað als ikki er nøktandi at leggja eitt uppskot fyri tingið, har fíggjarligu avleiðingarnar fyri vinnuna ikki vera nærri viðgjørdar. </div><div><br></div><div>Fiskimálaráðið, sum eigur uppskotið, sigur, at politiskt er uppskotið at skilja sum ein fyribils loysn til ein varandi loysn er funnin í sambandi við gjøld frá fiskivinnuni og alivinnuni. </div><div><br></div><div><b>Væntar somu kvotu í ár</b></div><div><br></div><div>Og Jacob Vestergaard, landsstýrismaður, torir longu nú at staðfesta, at makrelkvotan hjá føroyskum skipum næsta ár verður á leið tann sama sum í ár.  </div><div>Í ár fekk landskassin 69 mió. kr. fyri makrelin. </div><div><br></div><div>Fíggjarmálaráðið hevur harafturat eitt uppskot, sum skal geva 13 milliónir í tilfeingis- og loyvisskatti næsta ár. Hálvt triðja prosent verður kravt av skattskyldugum inntøkum oman fyri eina millión hjá fiskivinnuni og alivinnuni. </div><div><br></div><div>Hetta er eisini galdandi í 2011 og 2012.</div><div><br></div>