FM í svimjing: Trý FM-met og tvey juniormet

Dagur tvey í FM í svimjing er liðugur. Tilsamans blivu fimm met sligin í dag, trý FM og tvey juniormet

Poula Øssursdóttir Mohr setti í dag nýtt Føroyskt met í firvaldssvimjing

10.05.2013 - 23:53

Pál Joensen, Poula Øssursdótir Mohr, og kvinnuliðið hjá Ægir settu í dag nýggj føroysk FM-met. Afturat tí kláraðu Kristina Elin Thomsen og Markus Joensen at seta nýggj juniormet.

Pál Joensen kom fyrstur á mál í 100 metur bringusvimjing við tíðini 1.03.00. Pál átti sjálvur gamla metið sum var 1.03.90. Í hølinum á Páli kom Markus Joensen við tíðini 1.04.77, sum er nýtt juniormet.

Poula Øssursdóttir Mohr vann 200 metur firvaldssvimjingina. Hon kom á mál við tíðini 2.23.25. Gamla metið, sum Kristina Elin Thomsen átti, var á 2.25.36. Kristina Elin Thomsen svam sína skjótastu tíð nakrantíð á teininum, og bleiv nummar tvey við tíðini 2.25.26, sum er nýtt juniormet.

Ægir-kvinnurnar vunnu stafettina og settu samstundis nýtt føroyskt met. Tær komu á mál við tíðini 4.25.43. Tær ið svumu fyri Ægir vóru: Birita Debes, Victoria Eysturdal, Turið S. Christiansen og Astrid Foldarskarð. Júst tær somu vunnu FM í fjør, og tær áttu eisini gamla metið á 4.27.11.

FM í svimjing er aftur á skránni í morgin. Sjónvarpið sendir beinleið frá 17.00 til 19.00