- Tíðindi, mentan og ítróttur
Skálafjarðartunnilin fyri tingið fríggjadagin
<div>Hóast málið um Skálafjarðartunnilin verður lagt fyri tingið, sleppur Løgtingið kortini ikki at taka støðu til sjálvt innihaldið í avtaluni við útlendska felagið. Tað skal bara geva landsstýrismanninum heimild at gera avtalu við felagið.</div><div><br></div><div>Bæði løgmaður og landsstýrismaðurin í innlendismálum boðaðu í gjár frá, at málið um Skálafjarðartunnilin skal leggjast fyri løgtingið.</div><div><br></div><div>Í Innlendismálaráðnum sita tey í løtuni eg evna eitt lógaruppskot til, sum skal vera liðugt seinast í hesi vikuni. Rúni Joensen, aðalstjóri í Innlendismálaráðnum sigur, at tey vænta og vóna at fáa uppskotið liðugt hósdagin.</div><div><br></div><div><b>Løgmaður kallar tingið saman</b></div><div>Kaj Leo Holm Johannesen, løgmaður, hevur gjørt av at kalla tingið saman. Hann miðar eftir at viðgera uppskotið hjá innlendismálaráðnum á landsstýrisfundi fríggjamorgunin, og síðani senda uppskotið í løgtingið. Hann vónar, at uppskotið kann koma til fyrstu viðgerð í næstu viku, men tað er nakað sum formansskapurin tekur avgerð um, sigur hann.</div><div><br></div><div>Tað, sum løgtingið kemur at taka støðu til, er at geva landsstýrismanninum heimild at gera sáttmála við eitt felag um at byggja, reka og fíggja Skálafjarðartunnilin. </div><div><br></div><div><b>Broyta lógina um einkarætt</b></div><div>Rúni Joensen, aðalstjóri, sigur við Kringvarpið, at talan allerhelst verður um at broyta grein 2 í lógini frá 2010 um einkarætt at byggja, reka og fíggja undirsjóvartunnil undir Skálafjørð og Tangafjørð. Tað var hendan lógin, sum gav landsstýrismanninum heimild at geva partafelagnum Skálafjarðartunlinum einkarætt at byggja og reka tunnilin.</div><div><br></div><div>Rúni Joensen væntar, at broytingin, sum verður gjørt, verður at geva landsstýrismanninum heimild at gera avtalu við eitt felag um at byggja, reka og fíggja Skálafjarðartunnilin undir teimum treytum, sum annars eru nevndar í lógini.</div><div><br></div><div>í lógarbroytingini verður ikki tilskilað, hvat felag, landsstýrismaðurin kann gera avtalu við. Tað kemur tí ikki at standa Copenhagen Infrastruccture Partners í lógaruppskotinum, sum er tað felagið, sum Innlendismálaráðið hevur samráðst við.</div><div><br></div><div>Sostatt fer løgtingið ikki at taka støðu til, um einkarætturin skal veitast í 30 ella 50 ár, ella um avkastið hjá felagnum skal vera so og so stórt. Tað einasta, løgtingið skal taka støðu til, er sjálv heimildin hjá landsstýrismanninum at gera avtaluna.</div><div><br></div><div>Spurningurin er so, hvussu nógvan skund málið hevur. Aðalstjórin í Innlendismálaráðnum sigur, at tey samráðast við útlendska felagið og ætlanin var jú, at avtalan skuldi undirskrivast í hósdagin. Nú endar málið so í tinginum fyrst, og hann væntar, at málið neyvan verður avgreitt fyrr enn eftir ólavsøku. Málið er, at uppskotið kann koma í nevnd sum skjótast og so avgreiðast endaliga frá løgtinginum, tá tingið kemur saman aftur eftir summarfrítíðina.</div><div><br></div>
