Venjarin: Ísland hevur lært av dystinum í heyst

Ísland skal royna seg ímóti einum sterkum føroyskum hondbóltslandsliðið, sigur íslendski landsliðsvenjarin Arnar Pétursson, sum kortini sigur seg hava lært nógv av teimum trimum farnu dystunum í vetur.

Serliga tí fyrsta í oktober, sum Føroyar vann 24-22 í Íslandi. Síðan hava Arnar Pétursson og spælararnir vunnið tvær ferðir á Føroyum - í venjingardysti í november og í HM-dysti í desember.

 - Vit spældu ein sera harðan dyst ímóti Føroyum í heyst, sum vit taptu, men eg eri sannførdur um, at vit lærdu nógv tann dystin, segði Arnar Pétursson undan venjingini hjá Íslandi við Tjarnir í gjár.

Venjarin ger greitt, at Ísland í kvøld møtir einum sterkum føroyskum liði, sum verjir væl, hevur góðar málverjar og sterkar álopsspælarar.

 - Hetta er eitt lið við styrki á fleiri økjum, og tey gera eitt framúr arbeiðið í Føroyum, segði Arnar Pétursson.

 - Vit mugu berjast og vinna nærdystirnar, har Føroyar eru sterkar, og vit mugu klára at renna við teimum. Tað er lykilin, sigur venjarin