Fámará hevur einki kostað landskassanum

Fámara hevur einki kostað landskassanum. Men Jarðargrunnurin og nú Búnaðargrunnurin hevur í tíðarskeiðinum 2000-2013 havt ymsar útreiðslur av festinum, slakar 200.000 kr. frá 2000 til 2009, tá eingin búði í Fámara, og góðar 20.000 kr. síðani 2010.

Tað mesta er farið til olju og trygging og nakað til streym og umvælingar.

Jacob svarað fyrispurningi

Jacob Vestergaard, landsstýrismaður í landbúnaðarmálum, hevur svarað teimum 25 spurningunum, hann fekk frá Jógvani Skorheim, løgtingsmanni, um Fámara.

Búnaðarstovan hevur, sambært svarinum hjá Jacob Vestergaard, fingið at vita frá røktaranum, at hann í 2010 gav Johan Dalsgaard loyvi at búgva í festihúsinum við teirri treyt, at hann skuldi aftur haðani uttan freist.

Sambært røktaranum varð eingin skrivlig avtala gjørd.

Mugu ikki leigast út

Búnaðarstovan gav í oktober í 2010 røktaranum boð um, at festihúsini mugu ikki leigast út. Nú er ein mánaður síðani, at Búnaðarstovan bað Fútarættin hjálpa sær at fáa fólkini í Fámara út.

Fútarætturin viðger áheitanina fríggjadagin 13.september.

Festisýn varð gjørt í Fámara í apríl 2000. Tá vóru átta maskinur á festinum, men virðið á teimum varð ikki upplýst. Onkur maskina er síðani seld, hinar eru framvgeis í Fámara.

Sambært festisýninum vóru sethúsini í "rættiliga góðum standi" og fjósið í "nøkunlunda standi" tá í 2000.

Í ringum standi

Í 2010 vóru bygningarnir í ringum standi, og tað eru teir eisini í dag, stendur í svarinum.

65 áseyðir hoyra til festið í Fámara.  Eftir at Fámara varð fest aftur, er bara eittans festi í Føroyum, sum ongan festara hevur. Tað er í Hósvik og verður brúkt til royndarbrúk.