Landið og kommunur hava støðugar skattainntøkur

Landið hevur fyrstu átta mánaðirnar í ár fingið nærum somu skattainntøku sum sama tíðarskeið í fjør. Tað vísir ein skattauppgerð hjá TAKS. Landið hevur higartil í ár fingið 814 milliónir krónur inn í skatti, og sammett við í fjør er talan um eina evarska lítla minking, 0,1 prosent.

Kommunurnar 11 mió. færri

Kommunurnar hava higartil fingið minni inn í skatti fyrstu átta mánaðirnar í ár enn í fjør. Tær hava higartil í ár fingið 933 milliónir krónur inn í skatti, og hetta eru 11 milliónir krónur færri enn sama tíðarskeið í fjør. Afturgongdin 1,2 prosent.

Millum størru kommunurnar hava Klaksvíkar kommuna, Tvøroyrar kommuna og Vága kommuna framgongd, meðan eitt nú Runavíkar kommuna og Tórshavnar kommuna hava fingið minni inn í skatti fyrstu átta mánaðirnar í ár sammett við í fjør.

Tórshavnar kommuna er millum kommunurnar, sum í ár hava lægri skattaprosent samanborið við í fjør.

152 mió. í eftirlønarskatti

Fyrstu átta mánaðirnar eru slakar 152 milliónir krónur komnar inn í eftirlønarskatti og 26 milliónir í kirkjuskatti. Eftirlønarskatturin er væl hægri enn sama tíðarskeið í fjør, slakar 17 milliónir krónur meira.

Eftirlønir, ið verða fluttar uttanlands, vórðu ikki skattaðar fyrra hálvár í fjør, og tí er neyðugt at taka fyrivarni við samanberingargrundarlagnum, tá ið tað snýr seg um eftirlønirnar, sigur Taks.