- Tíðindi, mentan og ítróttur
Avstralia: Samkynd kunnu kortini ikki giftast
![](https://kvf.fo/sites/default/files/styles/grein-ovasta-mynd/public/lgbt.jpg?itok=2Dc8vPzW)
Hægstirættur í Avstralia hevur gjørt av, at tað kortini ikki skal bera til hjá samkyndum at giftast.
Í fimm dagar kundu samkynd giftast í avstralska høvuðsstaðnum, Canberra, eftir at landspartatingið í heyst samtykti eina lóg, sum loyvdi fólki av sama kyni at giftast.
Nú hevur hægstirættur sagt, at nýggja lógin samsvarar ikki við eina aðra lóg, sum í 2004 nágreinar, at bert maður og kvinna kunnu giftast.
Seinastu dagarnar eru 27 samkynd pør gift, men hjúnarlagið verður nú ógildað. Hægstirættur sigur, at hann hevur dømt eftir lógini, og tað stendur til tingið at gera av, um lógin skal broytast.
Í fleiri landspørtum í Avstralia ber til hjá tveimum av sama kyni at skráseta seg í parlag, men tey kunnu ikki giftast.
Ólógligt at vera samkyndur í India
Kynslig samvera millum samkynd er nú aftur ólóglig í India.
Hetta er støðan, nú Hægstirættur hevur kolldømt ein úrskurð hjá einum lægri rætti, sum fyri fýra árum síðani segði, at kynslig samvera millum samkynd var ikki eitt brotsverk.
Tá varð rættarúrskurðurin fagnaður av mannarættindabólkum sum ein stórur sigur í stríðnum fyri borgararættindum í India. Men nú hevur Hægstirættur kolldømt tann úrskurðin.
Seta gamla lógargrein í gildi aftur
Lógargrein 377, sum hon er nevnd, hevur verið partur av indiskari lóggávu, síðani hjálandatíðinatíðina. Lógargreinin bannar fólki at hava "kynsliga samveru ímóti náttúrunnar fyriskipan."
Í úrskurðinum sigur Hægstirættur, at gamla lógargreinin hevur rættargildi, og at tað er lóggávutingið, ið má gera av, um hon skal varðveitast ella ikki.
Amnesty International í India sigur, at úrskurðurin er stórt bakkast fyri indiska samfelagið, og at landið við hesum er sett mong ár aftur í tíðina, tá talan er um at verja grundleggjandi borgararættindi.