Damanaki fær svarið í dag ella í morgin

Føroyska samráðingartoymið hevur viðgjørt uppskotið seinastu dagarnar, og eitt skriv verður nú spakuliga orðað.

Jacob Vestergaard sigur við útvarpið fyrrapartin, at svarið verður sent í dag ella í morgin. Maria Damanaki segði á tíðindafundinum í Tinganesi hósdagin, at hetta tilboðið er munandi betri enn tey tilboðini, sum føroyingar fyrr hava fingið.

Hvørki Jacob Vestergaard ella Maria Damanaki vildu tá siga, hvat tilboðið er. Og landsstýrismaðurin er enn tættur sum tunnan.

Hann vil ikki siga, um tummilin vendur upp ella niður.