Støddfrøði, alis- og evnafrøði sum eftirútbúgving

Bjørn Kalsø sigur í samrøðu við Skúlablaðið í gjár, at eftirútbúgvingar eiga at bjóðast út við jøvnum millumbilum.

Men at tað er neyðugt at raðfesta, og tí stendur náttúruvísindarliga øki fyri tørni fyrst. Í fyrsta umfarið verður dentur lagdur á støddfrøði, alis- og evnafrøði og síðani kunningartøkni.

Og eftirútbúgvingar innan hesi øki verða bodnar út at byrja í heyst, sigur Bjørn Kalsø.

Útbúgva orðblindalærarar

Ætlanin er eisini at bjóða útbúgving út til teirra, ið vilja arbeiða sum orðblindalærari í fólkaskúlanum.

Fyri góðum trimum árum síðan tóku um 20 lærarar prógv sum orðblindalærari, og flestu teirra arbeiða aðrastaðni enn í fólkaskúlanum, tí teir vóru útbúnir til at undirvísa vaksnum, sum eru orðblind.

Útbúgvingin, sum nú fer av bakkastokki, fatar um alt økið, bæði fólka- og miðnámsskúla umframt vaksnamanaundirvísing, og hon byrjar í heyst, sigur Bjørn Kalsø.