Fleiri vindskaðar fráboðaðir kring landið

Í Klaksvík varð boðað frá at nakrar takplátur fuku runt Stangavegnum. Løgreglan ringdi til sløkkiliðið í Klaksvík, sum fór á staðið og tók sær av plátunum.

Í Árnafirði varð í gjárkvøldið boðað frá, at bylgjubrótarin í havnini hevði slitið. Klaksvíkar Havn fekk boðini, men fekk einki gjørt, tí ókyrt var í sjónum.

Í Havn var trolbáturin Skálafossur um at slíta. Boðað varð frá, at fleiri endar vórðu slitnaðir. Tórshavnar Havn fekk boðað eigaranum frá og fólk fóru umborð og bundu hann væl aftur.

Í Kollafirði var nakað av gróti komið niðan á landsvegin í tí nógva uppganginum. Landsverk kom á staðið og ruddaði grótið burtur.