Grágás í Føroyum skal ikki friðast

Jacob Vestergaard, landsstýrismaður í fiskimálum, vil hava Løgtingið at broyta fuglaveiðilógina, so loyvt verður at skjóta grágás ella styggja hana við byrsu.

Jarðareigarar eiga at sleppa at skjóta grágás í veltum bøi, sigur landsstýrismaðurin. Bøndur siga, at grágásin ger stóran skaða á bøin. Tað vísa royndir hjá Búnaðarstovuni eisini.

SÍ EISINI Bøndur vilja sleppa at skjóta grágás

Búnaðarstovan hevur tí biðið landsstýrið um at fáa lógina broytta, so loyvt verður at skjóta grágás aftur í Føroyum, men bara á veltum lendi.

Føroya fuglafrøðifelag ósamt

Føroya fuglafrøðifelag mælir tó staðilig frá, at loyvi verður givið til at skjóta grágás. Tað sigur felagið í hoyringarsvari, ið er sent Fiskimálaráðnum.

Sambært Fuglafrøðifelagnum eru enn eingi vísindalig prógv fyri, at grágásin elvir til týðandi fíggjarligan miss hjá bóndunum.

SÍ EISINI Fuglafrøðifelagið mælir frá at skjóta grágás

Uppskotið hjá Jacob Vestergaard var á skránni fyri landsstýrisfundin í gjár, og tað verður nú sent samgonguflokkunum til ummælis.