Málið í Norðdepli: Skal sita fýra vikur afturat

Ungi maðurin, sum er skuldsettur fyri at hava stungið fýra fólk í Norðdepli í fjør summar, skal sita í varðhaldinum í fýra vikur afturat.

Hann skal sita í varðhaldi til 28. mars, men hesaferð er orsøkin ikki, at mentalkanningin og persónskanningin ikki eru lidnar, tí tað eru tær. Men persónsskaðarnir, sum ungi maðurin elvdi til, gera, at rætturin heldur, at hann skal verða verandi í varðhaldi, sigur verjin, Jógvan Páll Lassen.

Sambært Føroya rætti er nú grundaður illgruni um, at maðurin ætlaði at drepa. Hann hevur alla tíðina verið skuldsettur fyri millum annað drápsroynd, men rætturin hevur higartil varðhaldsfonglað mannin, tí grundaður illgruni er um, at hann hevur skatt fólk við grovum harðskapi. 

Sitið í meiri enn hálvt ár

Maðurin hevur nú verið í varðhaldinum í meira enn hálvt ár. Málið kemur fyri í Føroya Rætti 28. apríl og tvær vikur eru fyribils settar av til rættarmálið.

Í løtuni verður málið fyrireikað, og so leingi sum ákæruvaldið ikki hevur reist ákæru móti manninum, er ikki greitt um talan verður um nevningating. Tað veldst um, hvørja grein í revsilógini, ákæruvaldið grundar ákæruna á.

Skuldsetti maðurin noktar seg sekan. Hann sigur seg einki minnast frá sunnumorgninum 14.juli í fjør.