Ásbjørg Hjelm nýtt juniormet í Danish Open

Tað gongur væl hjá føroysku svimjarunum í Danish Open kappingini í Danmark.

Ásbjørg Hjelm úr Ægir setti í morgun nýtt føroyskt juniormet í 50 metra bringusvimjing. Ásbjørg kom á mál við tíðini 35.44 sekund. 

Svimjing.com skrivar, at hetta er fyrstu ferð, at Ásbjørg fær skrásett eina tíð í 50 m. bringu á langgeil. Allíkavæl megnaði hon at taka føroyska juniormetið sum var 35.69.

Gamla metið átti Tanja Skaalum úr Suðuroyar Svimjifelagi. Tað setti hon á Small States stevnu í Hafnarfirði í 2010.

Tíðin hjá Ásbjørg er ikki langt frá føroyska metinum, sum Malan Vitalis Bærentsen setti í 2008. Føroyska metið er á 35.34 sekund.