Grønland skal vera strandarland

Danska stjórnin tekur undir við grønlendska kravinum um, at Grønland gerst strandarland, og Grønland verður partur av makrelavtaluni í framtíðini.

Tað sigur danski fiskimálaráðharrin, Dan Jørgensen, í einum svari til Saru Olsvig, fólkatingskvinnu úr IA.

ES, Noreg og Føroyar hava gjørt avtalu um makrelfiskiskapin næstu árini. Men Sara Olsvig er ikki nøgd við svarið.

Hon sigur við grønlendska kringvarpið, KNR, at tað er undrunarvert, at hvørki danska stjórnin ella grønlendska landsstýrið vóru uppií, tá ES, Noreg og Føroyar gjørdu makrelavtaluna.

Hóast Grønland kanska verður strandarland longu næsta ár, kann gerast trupult at fáa lut í makrelavtaluni, sum ES, Noreg og Føroyar hava gjørt, tí hon er galdandi í fleiri ár, sigur Sara Olsvig.