Lærarafelagið kolldømir landsroyndina

Undanroyndirnar til landsroyndina hjá næmingum í 4. og 6. flokki hava verið so miseydnaðar, at tær hava einki trúvirði longur. 

Tað sigur Føroya Lærarafelag í opnum brævi til Mentamálaráðið.

Herálvur Jacobsen, formaður í Lærarafelagnum, sigur í samrøðu við Útvarpið, at skipanin er gjørd í óðum verkum, og ov lítil orka er brúkt til at fáa eina skipan, ið er gjørd so skilagott sum møguligt. Harafturat hava myndugleikarnir verið alt ov seinir at gera royndina, sum krevst.

Formaðurin sigur, at lærarar eru ivingarsamir um sjálva skipanina og eru ótryggir undan landsroyndini síðst í hesum mánaðinum. Tá skulu umleið 700 næmingar inn á somu heimasíðu samstundis, og tí er tað neyðugt, at skipanin verður roynd áðrenn.

-Vit taka ikki námsfrøðiligu og tøkniligu ábyrgdina av tí, sum mentamálaráðið ger. Vit halda, at Mentamálaráðið átti at tikið hetta í nógv størri álvara, sigur Herálvur Jacobsen, tí bæði lærarar, næmingar og foreldur taka tað í álvara.

Lærarafelagið vil hava landsstýrismannin í mentamálum, Bjørn Kalsø, at umhugsa støðuna, um ráðiligt er at halda fram við landsroyndini.