Trygdin nógv betri í Noregi

Stórur munur er á trygdini á føroyskum fiskiskipum og norskum fiskiskipum.

Tað sigur Fiskimannafelagið í svari til løgtingið, sum viðger eitt uppskot hjá Tjóðveldi.

Tjóðveldi vil hava løgtingið at biðja landsstýrið kanna og leggja neyðug lógaruppskot fyri løgtingið, sum kunnu herða lóggávu, krøv og eftirlit við trygd og arbeiðsumhvørvi á føroyskum fiskiførum.  

Fiskimannafelagið skrivar, at fyri kortum var ein maður inni á gólvinum hjá felagnum og metti um trygdina á føroyskum fiskiskipum og um trygdina á norskum skipum. 

Niðurstøðan er, at munurin er rættiliga stórur. Norðmenn ger nógv meira burtur úr trygdini, sigur Fiskimannafelagið.

Trygdarskeiðini eru ikki nóg mikið. Ein 14 daga útbúgving í trygdarviðurskiftum á sjónum krevst, sigur Fiskimannafelagið. 

Fiskimannafelagið ivast eisini í, um trygdarprógvini, sum útlendskir fiskimenn koma við til Føroya, eru so nógv verd.  

Tað eigur harafturat at vera kravt, at málið um borð á føroyskum fiskiskipum er føroyskt.

Formaðurin í Fiskimannafelagnum, Jan Højgaard, mælir til, at útbúgvingin, sum fiskimenn eiga at fáa, skal fevna um millum annað trygd, lóggávu og sáttmálaviðurskifti.

Tað hevði eisini forðað fyri bíligari arbeiðsmegi í føroysku fiskivinnuni, sigur Jan Højgaard. 

Reiðarafelagið tekur undir við at kanna trygd og arbeiðsumhvørvi fyrst, áðrenn nøkur lóg verður samtykt og sett í gildi.

Tjóðveldi sigur í sínum uppskoti, at munur tykist vera á trygdarkrøvum og reglum í frálandavinnuni, á farmaskipum og ferðamannaskipum og so fiskiskipum. 

Tjóðveldi mælir tí til at eftirmeta og endurskoða trygd og arbeiðsumhvørvi á fiskiskipum.