Landið fær 30 milliónir av metvinningi

Landskassin fær 30 milliónir í einum høggi frá Føroya Tele.

Føroya Tele kungjørdi í dag besta úrslitið nakrantíð.

Føroya Tele hevði 56 mió. kr. í vinningi í fjør eftir skatt.

Einasti eigarin, landsstýrið,  fær 30 milliónir í vinningsbýti.

Føroya Tele upplýsir, at størri søla og effektivisering í nógv ár eru orsakirnar til góða úrslitið.

Úrslitið í fjør er 23 milliónir krónur betri enn í 2012.

Føroya Tele hevði ársaðalfund í dag. 

Johan Dahl, landsstýrismaður í vinnumálum, valdi allar nevndarlimirnir aftur.

Hann valdi Klaus Pedersen, Jóhannus Egholm Hansen, Fanny Petersen og Annbritt Klausen.

Starvsfólkini hava valt Janus Djurhuus, Ullu Stenberg og Christian Joensen í nevndina hjá Føroya Tele. 

Eftir aðalfundin skipaði nevndin seg við Klaus Pedersen sum formanni og Jóhannusi Egholm Hansen sum næstformanni.