Sambandsflokkurin farin á kreppufund

<p>Tað prutlar av álvara undir lokinum í Sambandsflokkinum, og alsamt fleiri vilja nú hava eykalandsfund fyri at fáa greiðu á, hvussu sterkur ella veikur Kaj Leo Holm Johannesen stendur sum formaður floksins.</p>

<p>Misnøgdin er stór við hansara handfaring av tollmálinum, og at hann ikki hevur virt støðuna hjá tingbólkinum í flokkinum um landsstýrismannin í fíggjarmálum.</p>

<p>Fyri einum hálvum tíma síðani fór flokkurin á &nbsp;kreppufund, har ónøgdin við formannin og hansara kós er&nbsp;á dagsskrá. Fundurin er&nbsp;á Gamla Apoteki, har landsstýris- og tingmanningin eru við - og sjálvandi løgmaður og formaður floksins eisini.</p>

<p>Alsamt fleiri í flokkinum siga nú - tó at tey ikki vilja standa opið fram enn - at flokkurin má loysa trupulleikan við formanninum, áðrenn val verður útskrivað. Og tað verður eisini nevnt, at Bárður Nielsen hevur vaksandi undirtøku fyri at taka formanssessin frá Kaj Leo Holm Johannesen.</p>

<p><strong>Álvarslig støða</strong></p>

<p>Lokalfeløgini eru misnøgd um, at sitandi formaður ikki hevur virt støðuna hjá tingbólkinum í tollmálinum og trupulleikanum við landsstýrismanninum í fíggjarmálum, og hetta er sera álvarslig støða, segði Eivin Jacobsen, tingmaður við útvarpið í gjárkvøldið.</p>

<p>Eisini Reimund Langgaard, Helgi Abrahamsen og Bárður Nielsen hava víst sína misnøgd um avgerðina hjá løgmanni um at lata Jørgen Niclasen verða sitandi sum landsstýrismann.</p>

<p>Jóna Mortensen, tingkvinna í Sambandsflokkinum, hevur ongar viðmerkingar til málið. Ikki annað enn at hon hevur álit á, at Kaj Leo Holm Johannesen ger tað besta fyri Sambandsflokkin, samgonguna og Føroya Land.</p>

<p>Tað hevur ikki eydnast at fáa orðið hini tingfólkini hjá Sambandsflokkinum, Rósu Samuelsen, Edvu Jacobsen og Alfred Olsen, sum eisini er formaður í tingbólkinum.</p>