7,4 mió. kr. afturat til Tórsvøll

Býráðið í Havn samtykti á eykafundi í gjárkvøldið at játta 7,4 mió afturat til Tórsvøll.

Tórshavnar býráð hevði annars samtykt at brúka í mesta lagi 35 milliónir krónur til útbyggingina. 

Arbeiðið at gera syðra part er komið væl áleiðis. Umframt áskoðarapláss skal bygningurin hýsa skrivstovum, matstovu og undirvísingarhølum. Men fyri nøkrum døgum síðani gjørdist greitt, at prísurin verður hægri enn tað. 7,4 milliónir skulu finnast afturat.

85 milliónir kr.

Øll útbyggingin kostar nú um 85 milliónir krónur, og kommunan skal rinda helvtina, tað vil siga 42,4 milliónir. Hina helvtina rindar Fótbóltssamband Føroya.

Tað var fyri tveimum mánaðum síðani, at Tórshavnar býráð samtykti at gera nýggjan áskoðarapall  til eystaru síðu eisini, og avgjørt varð at lata byggifelagið J & K Petersen, sum hevði vunnið arbeiðið at gera syðra part, eisini at gera eystaru síðu - uttan at arbeiðið varð boðið út.