Bæði til keyp og uppsparing

Húsarhaldini í Føroyum vænta at hava pengar at keypa fyri og at seta á bók. 

Og bæði tey, sum selja vørur, og tey, sum selja tænastur, vænta at selja meira hetta til næsta summar. 

Konjunkturvísitølini hjá handilsvinnuni og tænastuvinnuni eru hækkað nógv í ár.

Hjá handilsvinnuni var vísitalið 9 í januar. Tað var 29 í juni.

Hjá tænastuvinnuni var vísitalið 17 í januar. Tða var 56 í juni.

Orsøkin er rætt og slætt størri eftirspurningur og søla, sigur nýggjasta konjunkturkanningin hjá Fíggjarmálaráðnum.

At tænastuvinnurnar siga seg hava so stóra framgongd og vaksandi eftirspurning er tekin um, at samanumtikið er eftirspurningurin í samfelagnum eftir vørum og tænastum vaksandi, sigur Fíggjarmálaráðið.

Hægsta vísital  

Og millum teirra, sum keypa vørur og tænastur, eru húsarhaldini. Hjá teimum er vísitalið støðugt hækkað úr minus 29 fyri seks árum síðani, í juni 2008, upp í pluss 13 í juni í ár. 

13 er hægsta vísital, sum er skrásett, síðani húsarhaldini vórðu spurd fyrstu ferð, og tað var í januar 2006. 

Sambært kanningini hjá Fíggjarmálaráðnum eru fólk bjartskygd, tí tey vænta minni arbeiðsloysi og framgongd í búskapinum yvirhøvur næstu 12 mánaðarnar.

Og umframt at keypa meira vænta nógv húsarhald, at tey fara at hava pening til uppsparing næsta árið.