Næstan bara menn eiga hálva millión eftir skatt

Inntøkurnar hjá monnum eru størri enn inntøkurnar hjá kvinnum í Føroyum.

Sambært fólkateljingini í 2011 hevði triði hvør maður, 32 prosent, sum bara hevur gingið í skúla í minni enn eitt ár eftir fólkaskúlan, meira enn 200.000 kr. í tøkari inntøku um árið. Teir eiga meira enn 200.000 krónur eftir, tá skatturin er goldin. 

Hjá kvinnunum er talið bara seks prosent.

Meira enn hálva millión eftir

Tølini frá fólkateljingini, sum Hagstova kunnger á sínari heimasíðu, vísa eisini, at 80 prosent av monnunum, sum hava hægstu útbúgving, hava meira enn 200.000 kr. eftir, tá skatturin er goldin. Hjá kvinnunum er talið 74 prosent.

Millum nógvu tølini sæst millum annað, at 14 menn, sum hava útbúgving, sum er styttri enn eitt ár eftir fólkaskúlan, hava meira enn hálva millión krónur eftir, tá skatturin er goldin.

Eingin kvinna er so væl fyri.

Og heldur eingin kvinna, sum hevur miðnám ella yrkisútbúgving ella miðhøga útbúgving, hevur meira enn hálva millión í tøkari inntøku um árið, hjá monnum eru tølini ávikavist 66 og 194.

Eisini hjá teimum, sum hava hægstu útbúgving, eiga menninir meira eftir at brúka.

Í tí bólkinum hava 34 menn og sjey kvinnur meira enn hálva millión eftir á kontuni, tá land og kommunur hava fingið sítt.  

Inntøkur í hesum hagtølunum eru lønarinntøka, inntøka av egnum virki, kapitalinntøka, pensjónsinntøka, veitingarinntøka og studningur.