Anita ger eftir boðunum

Anita ger eftir boðunum frá Kaj Leo Holm Johannesen, løgmanni, og gevst at fiska fyri 1. november.

Tað sigur Sørin Christiansen, reiðari, eftir at reiðaríið fekk boð frá løgmanni um, at veiðiloyvið og fiskiloyvið fyribils verða tikin frá garnaskipinum.

Í viðmerking til avgerðina sigur løgmaður, at Vørn hevur staðfest álvarslig brot á lógina um vinnuligan fiskiskap og kunngerð um skipan av fiskiskapinum eftir havtasku og svartkalva við gørnum á føroysku landleiðini.

Vørn sendi í apríl Fiskimálaráðnum skriv, har mælt varð landsstýrismanninum í fiskivinnumálum til, at veiði- og fiskiloyvi hjá fiskifarinum Anitu, verða tikin aftur fyribils, til endaligur rættardómur fyriliggur í málinum.

Grundað á ógegni í Fiskimálaráðnum, varð viðgerðin av málinum flutt úr Fiskimálaráðnum til Løgmansskrivstovuna.

Eftir at hava viðgjørt málið, hevur løgmaður tikið avgerð um, at øll veiðu- og fiskiloyvi hjá fiskifarinum Anitu verða tikin aftur fyribils í tíðarskeiðinum frá 1. november 2014 og til endaligur dómur fyriliggur í revsimálinum, sum er ávegis í rættin.

 
Sørin Christiansen sigur, at reiðaríið í løtuni viðgerð støðuna. Hann hevur eingi boð fingið um, nær sakarmálið byrjar í rættinum.