Fekk heilt málsøki uttan starvsfólk ella pengar

Tá Innlendisnmálaráðið varð niðurlagt í 2013, fekk Heilsumálaráðið málsøkið hús-, fólka- og arvarættur.

Men hvørki starvsfólk ella pengar vórðu flutt Heilsumálaráðnum saman við málsøkinum.

Tí hevur Heilsumálaráðið einki fingið gjørt við málsøkið. Men í fíggjarlógini fyri 2015 eru pengar settir av til eitt starvsfólk.

Karsten Hansen, landsstýrismaður í heilsumálum, sigur í svari til Bill Justinussen, løgtingsmann, at enn er ov tíðliga at avgera, um dagførda danska lógin um foreldramyndugleika skal setast í gildi í Føroyum. 

Pápar ongan rætt 

Galdandi lóg í Føroyum er frá 2007.

Bill Justinussen sigur í sínum fyrispurningi, at nøkur børn í Føroyum og føroysk børn uttanlands hava ikki rætt til regluliga samveru við bæði síni foreldur, tá foreldrini eru skild.

Í flestu førum sleppa páparnir ikki at síggja síni børn, tí mamman fær fullan ræðisrætt yvir rættindunum hjá børnunum. Mamman stýrir samveruni millum børn og pápa, sigur Bill Justinussen.