Her vilja 17 verða stjóri

Freistin at søkja starvið var úti mánadagin, og tá avtornaði hevði Fiskimálaráðið fingið 17 umsóknir til stjórastarvið á Búnaðarstovuni

17 kvinnur og menn kundu hugsað sær at tikið við stjórastarvinum her á Búnaðarstovuni í Kollafirði, upplýsir Fiskimálaráðið, ið hevur landbúnaðin í Føroyum sum málsøki

Sigmar Bláberg

Bjarni Mohr

19.02.2015 - 11:42

Nýggi stjórin skal leiða og samskipa arbeiðið á Búnaðarstovni, gera meginsetningar og raðfestingar fyri stovnin og virkisøkið, evna til ymiskt tilfar, ið Fiskimálaráðið hevur tørv á, og veita Fiskimálaráðnum ráðgeving, og skipa mannagongdinir á stovninum, ið tryggja góða borgaratænastu.

Tann, sum søkir, skal hava útbúgving og arbeiðsroyndir, ið eru viðkomandi fyri starvið, og fyrimunur er eitt nú at hava leiðsluroyndir og góðan málførleika.

Starvið er lønt í 37 lønarflokki og tað svarar til 46.800 krónur um mánaðin sambært sáttmálanum millim Fíggjarmálaráðið og Tænastumannafelag Landsins, tó uttan at vera tænastumannastarv.

Nýggi stjórin skal taka við 1. apríl ella skjótast eftir tann dagin dag. Fiskimálaráðið fer nú undir tilgongdina at seta nýggja stjóran á Búnaðarstovuni.