Reiðari: Útlendingar eiga í helvtini av flotanum

- Útlendskur kapitalur er í helvtini av øllum føroyskum fiskiskipum.

Tað segði Annfinn Olsen, formaður í Føroya Reiðarafelag, á fundi um fiskivinnuna, sum valfelagið hjá Sambandsflokkinum í Eysturoynni, Samhald, skipaði fyri í Mentanarhúsinum í Fuglafirði í gjárkvøldið.

Tað skrivar heimasíðan ting.fo.

Formaðurin í Reiðarafelagnum legði dent á, at útlendski kapitalurin í føroysku fiskivinnuni er minni enn tann triðingin, sum lógin um vinnuligan fiskiskap loyvir.

Annfinn Olsen er sjálvur reiðari, og á fundinum legði hann doyðin á, at í hansara fyritøku eiga íslendingar ikki meira enn ein fjórðing.

Heldur seg til loyvda hámarkið

Ting.fo skrivar, at eisini reiðarin í Klaksvík, Hanus Hansen, greiddi fundarfólkinum frá, at útlendski parturin í sínum feløgum eisini heldur seg til loyvda hámarkið, sum er ein triðingur.

- Eg haldi, at tað er nógv fyri, og eg føli tað óbehagiligt alla tíðina - og seinast nú av einum løgtingsmanni - at verða lagdur undir at bróta lógina um útlendskan kapital í vinnuni, segði Hanus Hansen. Hann sipaði til, at Helgi Abrahamsen, løgtingsmaður, sum á fundinum beinleiðis spurdi, um søgurnar um útlendskan ræðisrætt eru sannar.

Ting.fo skrivar, at tingmaðurin umbar, at hann hevði sett spurningarnar, men metti teir neyðugar fyri at fáa beinleiðis svar, um útlendingar eiga ov stóran part í reiðaravirkseminum.