Støða ikki tikin til samstarv

Endalig støða skuldi í morgun takast til uppskotið frá nevndini um at broyta viðtøkurnar soleiðis, at heimild verður at avhenda vindmyllulundinar í Neshaga og Húsahaga til partafelag ella smápartafelag.

Aðalfundurin hjá SEV endaði kortini uttan atkvøðugreiðslu fyrrapartin. Ósemja er um Magn skal eiga ein part av vindmyllulundini í Húsahaga.

Spurningur um ognarskap avgreiðast fyrst

- Spurningurin um ognarskap eigur at fáast uppá pláss áðrenn eitt partafelag kann gerast, segði Heðin Mortensen, borgarstjóri í Havn, við útvarpið á middegi.

Hann heldur, at viðurskiftini mugu lýsast betri og fáast uppá pláss, áðrenn klárt er at gera eitt partafelag og SEV og Magn kunnu byrja samstarv.

- Viðurskiftini eru so ógreið, at tað má verða ein eykaaðalfundur bara um tað málið, har vit áðrenn kunnu fara til bý- og bygdaráðini, sigur Heðin Mortensen, borgarstjóri.