Konservativi flokkurin verður greiður vinnari

Valhølini lótu aftur klokkan 10 okkara tíð í gjárkvøldið, og meira enn helmingurin av úrslitunum frá teimum 650 valøkjunum eru almannakunngjørd.

Úrslitini benda á, at Konservativi flokkurin hevur fingið dyggan stuðul. 

- Tað er sjálvandi gott at hoyra í nátt, segði David Cameron, formaður í flokkinum, - Men ov tíðliga til at staðfesta úrslitið.

Forsøgnin talar

Forsøgn hjá BBC vísur í morgun, at Konservativu kunnu fáa 325 sessir, meðan Labour fáa helst 232.

Sostatt er møgueliki fyri, at Konservativi flokkurin kann fáa meiriluta einsamallur,  nú umleið 70 prosent av atkvøðunum eru taldar.

Tað merkir samstundis, at Labour og LiberalDemokratarnir hava havt eitt vánaligt val. 

Ótryggur í sessinum

Leiðarin fyri Labour, Ed Milliband, dylur heldur ikki fyri, at hann er vónbrotin um fyribils-úrslitini. 

- Eg harmist almikið um tað, sum er hent, segði hann við fjølmiðlar í morgun. Hetta er eitt vónbrot og pínufull nátt, segði Ed Milliband.

Bretskir miðlar skriva í morgun, at tað er óvist, um Ed Milliband heldur fram sum formaður, nú nógv bendur á, at  flokkurin verður stóri taparin á valinum. Trýstið á hann  økist, so hvørt sum atkvøðurnar verða taldar.

Frøði í Skotlandi

Hinvegin fegnast veljarar hjá skotska tjóðskaparflokkinum, SNP, um valúrslitið. Í gjárkvøldið vístu valdags-mátingar, at flokkurin fær 58 av teimum 59 skotsku sessunum í parlamentinum. Fyrstu uppteljingarnar í skotkum valdømur geva eisini somu mynd, at flokkurin verður greiður vinnari.

Sambært Sky News fer David Cameron til bretsku drotningina í dag kl 11 okkara tíð. Og síðani fer hann at tosa við fjølmiðlar.