Føroyingar skulu ikki ávirka stjórnarviðurskiftini

Tað kemur fram í kanning, sum Fynd hevur gjørt fyri Sosialin í apríl. Hetta skrivar in.fo. 

43,1 prosent av teimum spurdu halda ikki, at føroysku fólkatingslimirnir skulu leggja seg út í stjórnarviðurskiftini í Danmark. 37,1 prosent halda hinvegin, at føroysk fólkatingsumboð skulu taka støðu til, hvør stjórnar Danmark. 12,8 prosent siga seg ikki vita, hvat tey halda.

Av teimum spurdu eru tað flestir javnaðarveljarar, ið halda, at føroysku umboðini á Christiansborg skulu blanda seg í stjórnarviðurskiftini í Danmark. Sambært kanningini halda 46,7 prosent av øllum javnaðarveljarum, at fólkatingsumboðið eigur at vera við til at avgera, hvør stjórn skal sita í Danmark. 

41,2 prosent av sambandsveljarunum halda, at føroysku umboðini á Christiansborg skulu blanda seg í stjórnarviðurskiftini í Danmark. 

Hjá tjóðveldisveljarum er støðan greiðari. Har halda 71,5 prosent av veljarunum, at eitt møguligt umboð fyri flokkin á fólkatingi IKKI skal blanda seg í stjórnarviðurskiftini í Danmark.