16 tingfólk fyri at broyta hjúnabandslógina

16 løgtingslimir siga seg vilja atkvøða fyri at broyta hjúnarbandslógina, soleiðis at samkynd eisini kunnu giftast borgarliga.

Tað vísir eitt spurnarumfar hjá Sosialinum.

Blaðið spurdi í gjár øll 33 tingfólkini, hvørja støðu tey hava til lógaruuppskot, sum broytir hjúnarbandslógina til eisini at umfata borgarliga vígslu millum tvey av sama kyni.

16 tinglimir siga seg vera fyri, 11 eru ímóti og seks tinglimir hava annaðhvørt ikki tikið støðu, ella vilja ikki svara spurninginum.

Uppskotið ikki komið í tingið

Tá løgtingið hevði sín fyrsta fund týsdagin boðaði Sonja Jógvansdóttir, sum tá var løgtingskvinna fyri Javnaðarflokkin, frá, at hon beinan vegin tann dagin fór at lata løgtingsskrivstovuni lógaruppskot um at broyta hjúnarbandslógina. 

Lógaruppskotið er tó framvegis ikki latið løgtingsskrivstovuni.

Sonja Jógvansdóttir, sum nú er uttanflokkatingkvinna, sigur við útvarpið, at hon fyribils hevur valt at bíða við at leggja uppskotið fram. Hon vil hava onnur løgtingsfólk til at leggja tað fram saman við sær, sigur hon.