SU veitir Javnaðarflokkinum fullan stuðul

Tað, ið er eftir av Ungmannafelagnum hjá Javnaðarflokkinum, Sosialistisk Ung, veitir nú Javnaðarflokkinum sín fulla stuðul.

SU heldur, at hjúnabandslógin skal broytast, og felagið fegnast um, at ein stórur meiriluti av Javnaðarflokkinum eisini vil broyta hjúnabandslógina.

Í yvirlýsing fyrrapartin sigur SU seg tó ásanna, at tað eru bæði fyrimunir og vansar við at gera hjúnabandsmálið til eitt samgongumál. 

Avgreitt sum skjótast

- Men fyri okkum hevur tað størstan týdning, at málið verður avgreitt sum skjótast, so samkynd kunnu fáa somu borgarligu rættindi sum onnur. Vit mongu, sum eru virkin í SU, fara nú at leggja alla orku í týdningarmikla politikkmenning, eitt nú við at leggja okkara fólkavaldu umboðum lag á í mun til tey mál og evnir, sum viðkoma Føroya ungdómi, sigur ungmannafelagið hjá Javnaðarflokkinum.

Mikudagin boðaðu forkvinnan í SU, Oda Strøm, og kassameistarin, Barbara Gaardlykke Apol, frá, at tey tóku seg úr Javnaðarflokkinum.

Tað var gjørt sum avleiðing av tí viðferð, sum Sonja Jógvansdóttir hevði fingið av Javnaðarflokkinum, søgdu tey.

SU hevði limafund í gjárkvøldið, og eftir tann fundin er greitt, at ungmannafelagið nú aftur stuðlar flokkinum.