Bankin ætlaði at keypa jørðina í 2013

Bankin ætlaði at byggja út, 600 fermetrar í trimum hæddum, og gera bilpláss til 90 bilar. Fiskimálaráðið var sinnað at selja, men við teirri treyt, at útbyggingin ikki forðaði fyri, at grannin, Sjóbjargingarstøðin, eisini kann byggja út.

Tað sæst í brævaskifti, sum Útvarpið hevur fingið innlit í. Útbyggingin hjá BankNordik varð tó av ongum. Bygningurin í Húsagøtu varð í fjør seldur Tórshavnar kommunu, og BankNordik bygdi nýtt høvuðssæti í Havn.

SÍ EISINI Átta milliónir fyri 1500 fermetrar

Nú ætlar danska Bygningsstyrelsen so at keypa bygningin í Húsagøtu frá kommununi til politistøð. Og Bygningsstyrelsen hevur eisini brúk fyri lendinum hjá Fiskimálaráðnum norðanfyri.

Fiskimálaráðið er sinnað at selja 1500 fermetrar fyri átta milliónir krónur. Men lendið hjá Fiskimálaráðnum er framvegis við, tá bankin og landsstýrið á vári í 2013 tingaðust um tríggjar bygningar hjá BankNordik í miðbýnum í Havn, sum landið ætlaði at keypa.

Landið skuldi keypa bankan og grannabygningarnar, har sum handilin Guðrun og Guðrun er og Skyn var, fyri 51 mió. kr. Tann handilin varð tó av ongum, tí Tórshavnar kommuna keypti bankan í miðbýnum.