Lækka kommunuskattin tvey prosentstig

Jógvan í Skorini, borgarstjóri á Eiði, sigur, at sambært uppskotinum um fíggjarætlan fyri 2016, lækkar skattaprosentið næsta ár.

Barnafrádrátturin verður sambært uppskotinum tann sami sum í ár, 7.500 kr. Men, sigur borgarstjórin, treytin er, at landið ongar stórar fíggjarligar byrðar leggur á kommununa.

Góð útlit geva rúm fyri skattalækking

Tað ber til at lækka skattaprosentið á Eiði, tí útlitini hjá kommununi eru framúr góð, stóru inntøkurnar í ár og metingin fyri 2016 loyva lækkingini, sigur Jógvan í Skorini.

Í uppskotinum um fíggjarætlan fyri 2016 eru eisini nakrar stórar íløgur. Ítróttar-, bygdar- og frítíðarskúlahús til 300 fólk skal byggjast við fótbóltsvøllin í Hólmanum. Tað skal vera liðugt næsta ár.

Mentanarmiðdepilin við skúlan skal eisini gerast liðugur. Har eru venjingarhøli til tónleikarar og høli til fyrilestrar og biograf. Uppskotið um fíggjarætlanina hjá Eiðis kommunu fyri 2016 skal til fyrstu viðgerð týsdagin.