Rognkelsi bóru ikki virus

Rognkelsini, sum alibrúk í Føroyum keyptu úr Íslandi, bóru ikki VHS virusið við sær til Føroya, sigur Heilsufrøðiliga starvsstovan

Heilsufrøðiliga starvsstovan tók 195 sýni av rognkelsunum í alibrúkunum, og kannaðu tey á tveir ymiskar mátar. Øll úrslitini eru negativ

Høgni Djurhuus

Bjarni Mohr

08.12.2015 - 09:28

Heilsufrøðiliga starvsstovan tók 195 sýni av rognkelsunum í alibrúkunum, og kannaðu tey á tveir ymiskar mátar. Øll úrslitini eru negativ, sigur Heilsufrøðiliga starvsstovan.

Síðst í oktober varð VHS virus staðfest hjá rognkelsum í einari íslendskari alistøð, sum seldi alibrúkum í Føroyum rognkelsi. Rognkelsi verða brúkt til at taka laksalús.

Herda eftirlitið steðgað

VHS virus elvir til ringa fiskasjúku. Heilsufrøðiliga starvsstovan sigur, at herda eftirlitið við VHS hjá rognkelsum í alibrúki er nú steðgað.

Mett verður, at VHS smitta ikki er í hesum rognkelsum, sum komu úr Íslandi. Harafturat tóku tey í Íslandi sýni av øllum foreldrafiskunum at rognkelsunum, sum fóru til Føroya, áðrenn tey vórðu strokin.

Eisini hesi sýni vóru negativ fyri VHS virus. Og rognkelsi, sum høvdu VHS virus, og rogn og yngul, sum fóru til Føroya, vóru atskild.