Lógaruppskot um gjøld komið í tingið

Lógaruppskotið hjá Fíggjarmálaráðnum, sum skal loyva landinum at taka 108 milliónir krónur frá alivinnuni næsta ár, kom í Løgtingið í gjár.

Sambært galdandi lóg hevði landið fingið 40 mió. kr. í loyvisskatti og tøkugjaldi í 2016. Sambært uppskotinum, sum kom í gjár, fær landið í staðin fyri 108 mió. kr. í tøkugjaldi.

Alivinnan skal tí rinda landskassanum 68 milliónir krónur meira næsta ár. Tøkugjaldið verður ásett eftir prísinum, sum fæst fyri laksin.

Fíggjarmálaráðið broytti uppskotið

Hægri prísur gevur størri gjald, tó í mesta lagi fimm prosent, tá prísurin fer upp um 27 krónur fyri kilo. Fíggjarmálaráðið hevur broytt uppskotið, eftir at alarar gjørdu vart við framleiðslukostnaðin.

Upprunaliga var ætlanin at taka fimm prosent av prísinum, tá hann fór upp um 25 krónur. Men tað er hækkað upp í 27 krónur í lógaruppskotinum.

Fyrst var gjaldið 2,5 prosent, tá prísurin er millum 23 og 25 krónur. Men tað er broytt til at vera 2,5 prosent. tá prísurin er millum 23 og 27 krónur.

Mæla staðiliga frá at uppskotið verður samtykt

Kortini er uppskotið mett at geva landskassanum tað sama sum upprunaliga mett. Samstundis verður loyvisskatturin, hálvt fimta prosent av skattskyldugu inntøkuni, strikaður.

Tøkugjaldið kann dragast frá í skattskyldugu inntøkuni hjá alivinnuni, sum í 2017 fer at rinda góðar 12 milliónir krónur minni í partafelagsskatti, hevur Fíggjarmálaráðið roknað út.

Landsstýrið heldur, at alivinnan eigur at rinda fyri síni framíhjárættindi, sum eru atgongdin til føroysku aliøkini. Alararnir, Havbúnaðarfelagið, mæla løgtinginum staðiliga frá at samtykkja uppskotið.