Havnarfólk vilja búgva í íbúðum

Seinastu átta árini er triði hvør bústaður, sum er bygdur í Havn, íbúð. Íbúðir fara eisini at seta dám á byggjaríið í Havn næstu árini

Íbúðir fara at seta sín dám á bústaðarbyggingina í Havn næstu árini, upplýsir Tórshavnar kommuna. Seinastu átta árini er triði hvør bústaður, ið er bygdur í høvuðsstaðnum, íbúð

Høgni Djurhuus

Bjarni Mohr

02.05.2016 - 16:27

Íbúðir fara at seta sín dám á bústaðarbyggingina í Havn næstu árini, upplýsir Tórshavnar kommuna. Nú eru sjey prosent av bústøðunum í kommununi íbúðir, upplýsir kommunan á heimasíðuni.

Kommunuætlanin verður dagførd næsta ár. Og býráðið vil fegin frætta frá fólki í kommununi, hvat tey vilja hava við í ætlanina. Ætlanin er framvegis, at fólkatalið í kommununi skal vaksa eitt prosent um árið.

Brúk fyri 2.040 nýggjum bústøðum

Tvey tey seinastu árini er fólkatalið í Tórshavnar kommunu vaksið ávikavist 1,4 og 1,5 prosent. Mett verður, at veksur fólkatalið sambært forsøgnini, er brúk fyri 2.040 nýggjum bústøðum.

Á sama hátt sum í øðrum vesturlendskum londum verður roknað við, at húskini í Føroyum gerast 10 prosent minni komandi 16 árini. Tá vera í miðal 2,45 fólk í hvørjum húski í Føroyum.

Við væntaða vøkstrinum fram til 2030 verða 400 børn afturat í aldrinum 0-6 ár í Tórshavnar kommunu. Tí verður brúk fyri seks nýggjum dagstovnum. Og brúk verður fyri 210 nýggjum bústøðum til fólkapensjónistar.