Føroya bestu svimjarar í sjónvarpinum

Føroya bestu svimjarar skulu kjósast, nú 42 gullheiðursmerki og føroyameistaraheiti standa upp á spæl næstu dagarnar. FM kappingin í svimjing byrjar í dag og heldur fram í morgin og ovurmorgin.

FM á stuttgeil er somuleiðis síðsti møguleiki at svimja seg á landsliðini til Evropeisku Junior Meistarastevnuna í Ungarn í summar og Norðurlendsku Meistarastevnuna fyri ung, sum verður í Finnlandi um somu tíð. 

Tilsamans 76 svimjarar úr seks feløgum fara at kappast næstu dagarnar, og sum gongdin hevur verið seinastu mánaðirnar við bæði føroyskum metum og juniormetum í kappingum herheima og uttanlands, so er tað ikki ósannlíkt, at fleiri nýggj met verða sett í svimjing næstu dagarnar.

Í fjør vórðu fimm føroysk og seks junior met sett. 

Altjóða avbjóðingar

- Vit gleða okkum til at síggja spennandi kappingar og skjóta svimjing á hesi síðstu svimjistevnuni herheima fyri summarsteðgin. Eftir tað, er tað heimurin, sum bjóðar av við EM, OL og so framvegis, sigur Rókur í Jákupsstovu, formaður í Svimjisambandi Føroya á heimasíðuni, svimjing. com.

Fimm svimjarar umboða Føroyar til EM, sum verður í London í summar. Tey eru Sára Ryggshamar Nysted og Pál Joensen úr Suðuroyar Svimjifelagi, Signhild Joensen og Alvi Hjelm úr Ægi og Óli Mortensen úr Havnar Svimjifelagi. Harafturat skal Pál Joensen eisini til OL í Rio í august. 

Sjónvarpið sendir allar finalurnar beinleiðis, og vit byrja hvønn dag klokkan 17. Tað ber til at síggja sjónvarpið á heimasíðuni hjá KVF her:  http://kvf.fo/webservice/player/sjonvarp