Gamalt samstarv í søguna

Smyril Line noyðist at finna sær nýtt umboð á Seyðisfirði. 33 ára gamla samstarvið millum Jónas Hallgrímsson og felag hansara Austfar á Seyðisfirði og Smyril Line er slitnað.

Austfar hevur havt avgreiðsluna hjá Smyril Line á Seyðisfirði øll árini síðani 1983, tá Smyril Line byrjaði. Men um ein mánað verður hetta samstarvið søga.

Jónas Hallgrímsson sigur við Morgunblaðið, at Smyril Line vildi hava samstarvssáttmálan broyttan. Men treytirnar, sum felagið setti til nýggjan sáttmála, vóru av slíkum slagi, at Austfar kundi ikki góðtaka tær og segði sáttmálan upp.

Høvdu einki annað val

Jónas Hallgrímsson sigur, at tey høvdu ikki annað val enn at siga upp sáttmálan við Smyril Line. Tað kom óvart á tey, at hetta gjørdist neyðugt, tí samstarvið hevur verið drúgt og gott, sigur hann.

Eingin ætlan er tó um at gevast við virkseminum hjá Austfar. Nú verður leitað eftir nýggjum uppgávum, sigur Jónas Hallgrímsson við Morgunblaðið.

Jónas Hallgrímsson og Austfar avgreiddu eisini Smyril, tá hann sigldi til Seyðisfjarðar, so samstarvið við føroyingar vardi í 41 ár.