Tróndur í Gøtu leitar eftir makreli

Tróndur í Gøtu fer eisini í norskan sjógv og íslendskan sjógv. Tvey føroysk nótaskip eru við í árligu makrelkanningini í landnyrðingspartinum av Atlantshavi.

Grønland hevur leigað Finn Fríða til kanningarnar. Harafturat eru eitt íslendskt skip og tvey norsk við í kanningunum. Endamálið við kanningini er at meta, hvussu stórur makrelstovnurin er.

SÍ EISINI Tvey føroysk skip við í kanningum

Tey fimm skipini fara víða um. Kanningarøkið er tríggjar milliónir ferkilometrar. Øll skipini brúka somu útgerðina. Fýra granskarar hjá Havstovuni eru við Tróndi í Gøtu.

Hóast fremsta endamálið er at kanna makrel, verða onnur uppsjóvarfiskasløg eisini kannað, so sum svartkjaftur. Harafturat verður kannað, hvussu hvalur ávirkar makrel, svartkjaft og norðhavssild.