Bústaðir taka lán við at skriva út lánsbrøv

Bústaðir sleppa møguliga at taka lán við at skriva út lánsbrøv í Føroyum.

Í ársfrágreiðingini fyri 2015 skriva Bústaðir, at landsstýriskvinnan í fíggjarmálum í fjør heyst lovaði at viðgera spurningin saman við Fígging landsins, um Bústaðir kunnu læna pengar, tí um tvey ár er fæið hjá stovninum, 300 mió. kr.,  brúkt at byggja fyri. 

Kristina Háfoss vónaði í fjør heyst, at avgerðin um lánsbrøv kundi takast nú í summar.

Undanfarna landsstýrið vildi ikki loyva Bústøðum at taka lán. 

Á nýggjárinum leigaðu Bústaðir 110 bústaðir og knappliga 300 vóru í gerð.

Miðalleigan var 4.800 kr. um mánaðin.

Bústaðir gjørdu iløgur fyri 66 mió. kr. í fjør. Úrslitið eftir skatt gjørdist 3,4 mió. kr. í halli. Inntøkurnar í fjør vóru minni enn í 2014, tí minni fekst fyri virðisbrøvini, sum Bústaðir hava sett pengar í, tí rentan er so lág.

Í 2014 høvdu Bústaðir 2,5 mió. kr. í vinningi eftir skatt.