Freistin longd tvær vikur

Upprunaliga freistin, at lata inn tilboð upp á Eysturoyartunnilin, var 12. september. Freistin er nú útsett til 27. september.

Orsøkin er, at samtøkini, sum bjóða upp á arbeiðið at gera Eysturoyartunnilin, hava biðið um meira tíð.

SÍ EISINI Arbeiðið skal nú bjóðast út

- Tað er eitt sera umfatandi arbeiði at koma við tilboði upp á so stóra verkætlan, sigur Teitur Samuelsen, stjóri í P/f Eystur- og Sandoyartunlar.

Bara tey samtøk, sum P/f Eystur- og Sandoyartunlar hava góðkent, sleppa at lata tilboð. Krøvini eru millum annað, at samtøkini hava royndir við tunnilsbygging.

Fleiri samtøk undangóðkend

Seks samtøk eru undangóðkend, sigur Teitur Samuelsen. Men hann vil ikki siga, hvussu nógv tilboð hann væntar at fáa.

Eysturoyartunnilin er mettur at kosta eina milliard krónur. Ikki fyrr enn tilboðini eru komin síðst í september er greitt, hvør veruligi kostnaðurin fyri undirsjóvartunnilin er.

Longda freistin fer ikki at ávirka tíðarætlanina. Fyrsta skotið verður væntandi latið av í ár, sigur Teitur Samuelsen, stjóri í tunnilsfelagnum.