Ung í Føroyum niðarlaga í hagtølunum

Tað vísir kanning hjá Deildini fyri Arbeiðs- og Almannaheilsu og Fólkaheilsuráðnum, sum varð gjørd í fjør.

Deildin hevur síðan 1989 kannað hugburð, atburð og vitan um millum annað rúsevni hjá ungum í 9. flokki. Talan er um kanningarleist, sum millum 30 og 35 onnur lond í Evropa eisini brúka.

Roykingin nógv minkað

Hóast ung í Føroyum enn eru millum teirra, ið brúka minst av rúsevnum, so liggja vit ikki niðast, tá tað ræður um rúsdrekka. 10 prosent av teimum ungu søgdu seg hava drukkið seg full seinasta mánaðin.

Hetta tal er neyvt tað sama sum í kanningini í 2011, so mest sannlíkt er hetta ein veruligur heilsutrupulleiki millum ung, heldur Pál Weihe, yvirlækni og professari.

Góðu tíðindini eru, at sigarettroykingin er nógv minkað millum tey ungu hesi seinastu 20 árini. Í 1996 royktu útivið 40 prosent dagliga, men í 2015 bara átta prosent.