Lóg um dagpengar dagførast

Fiskimenn koma undir dagpeningalógina sambært lógaruppskoti, sum Eyðgunn Samuelsen, landsstýriskvinna, legði fram týsdagin.

Lógin um sjúkratrygd hevur sama endamál sum dagpeningalógin. Hon er bara galdandi fyri mynstraðar fiskimenn í minstulønarskipanini.

SÍ EISINI Betri skipan til fiskimenn

Trygdargrunnurin umsitur sjúkratrygdina. Fiskimenn verða sambært uppskotinum ikki verri fyri, hóast lógin um sjúkratrygd verður strikað.

Játtanin í fíggjarlógini til sjúkratrygd hjá fiskimonnum, sum er 4,6 milliónir, dettur burtur. Men játtanin til dagpeningaskipanina má síðani hækka 4,6 milliónir krónur.

Landskassin fær væntandi 1,1 millión í meirinntøku, tá lógarbroytingarnar eru framdar. Reiðaríini skulu endurrinda Almannaverkinum fyri fyrsta og annan fráverudag hjá fiskimonnum.